პროგრამა

მიმოხილვა

თბილისის ტური, 21 მაისი

თბილისი საქართველოს დედაქალაქის სტატუსს V საუკუნიდან ატარებს.
ისტორიულ ქალაქ მცხეთიდან სამეფო ტახტის თბილისში გადმოტანა და ახალი პოლიტიკური და კულტურული ცენტრის შექმნის იდეა მეფე ვახტანგ გორგასალს ეკუთვნის. სახელწოდება “თბილისი” დაკავშირებულია თბილ გოგირდოვან წყლებთან, რაც თბილისი ერთგვარი სავიზიტო ბარათია.

თბილისის ტერიტორიაზე ადამიანი ძვ. წ. IVათასწლეულიდან სახლობს, თუმცა V საუკუნიდან თბილისის, როგორც ქალაქის, განვითარება შეუქცევადი გახდა და მომდევნო საუკუნეებში იგი ჩამოყალიბდა კავკასიის პოლიტიკურ, ეკონომიკურ და კულტურულ ცენტრად. თბილისს ახსოვს მტერთა გამანადგურებელი შემოტევები, დამპყობლური ომები და აღზევებისა და აღმავლობის ეტაპები.

თბილისი იყო და რჩება ტოლერანტობისა და მშვიდობიანი თანაცხოვრების სიმბოლოდ, იგი მშობლიური ქალაქია აქ მცხოვრები მრავალი ეთნიკური და რელიგიური კუთვნილების ადამიანებისათვის, რომელთაც თბილისის განვითარებას თავისებური ხიბლი და შარმი შესძინეს.
საქართველოს დედაქალაქში თავმოყრილია ქართველი ხალხის კულტურული მემკვიდრეობის მნიშვნელოვანი ძეგლები. ქალაქი 2007 წლიდან იუნესკოს მსოფლიო მემკვიდრეობის ძეგლთა ნუსხაში შეტანის კანდიდატად ირიცხება. ძალზე შთამბეჭდავია ძველი ქალაქის უბნები, ისტორიული ციხე-სიმაგრის – ნარიყალას ირგვლივ გაშენებული ქალაქი საუკუნეთა მანძილზე ჩამოყალიბებული საქალაქო ცხოვრების ტრადიცით. აივნებიანი კოპწია შენობები, ციხე-სიმაგრები, ძველი ეკლესია-მონასტრები, ვიწრო თბილისური ქუჩები და ადგილობრივი თბილი მოსახლეობა ქალაქის საერთო განწყობას ქმნის. თბილისური არქიტექტურა თვითმყოფადია, ეს ქალაქი აღმოსავლეთისა და დასავლეთის შეხვედრის ადგილია, ამიტომაც არის, რომ აქ იპოვით ყველაფერს, რაც გიზიდავთ, გაინტერესებთ და შთაგაგონებთ.

თბილისი გამორჩეულია კულტურული ცხოვრებით, აქ არის ცნობილი თეატრები და მუზეუმები, ხშირია ფესტივალები, კონცერტები და გამოფენები.სამეცნიერო კონფერენციის ფარგლებში 21 მაისს დაგეგმილი თბილისის ტური მოიცავს ქალაქის ისტორიული ნაწილის მონახულებას (კალა, მეტეხი, აბანოთუბანი), კონფერენციის მონაწილეებს ექნებათ შესაძლებლობა ფეხით გაისეირნონ ძველი თბილისის ქუჩებში, სოლოლაკის ქუჩიდან და მეტეხის ტაძრის ეზოდან დატკბნენ ძველი ქალაქის პანორამული ხედებით. ტური დასრულდება საქართველოს ეროვნული ბოტანიკური ბაღს მონახულებით.

ტური კახეთში, 23-24 მაისი

კახეთი საქართველოს ერთ-ერთი ულამაზესი და უძველესი მხარეა, იგი ცნობილია კულტურუული მემკვიდრეობის ძეგლთა სიმრავლით, ისტორიით, საუცხოო ლანდშაფტებით, ალაზნის ნაყოფიერი ველით, დარბაისელი ხალხით, ღვინის მრავალფეროვნებით და ღვინის დაყენების უძველესი ტრადიციით.

კახეთი მუდამ ითვლებოდა ვაზისა და ღვინის მხარედ, არქეოლოგიური გათხრების შედეგად აღმოჩენილ იქნა ნიმუშები, რომლებიც ქრისტეშობამდე 7000-6000 წლით არის დათარიღებული რაც ამ რეგიონში მევენახეობისა და ღვინის წარმოების უძველეს წარმოშობაზე მეტყველებს. დღესდღეობით კახეთში ვაზის 80-მდე ჯიშია გავრცელებული. ქვევრის ღვინის ტრადიცია UNESCO-ს მიერ არამატერიალური კულტურული მემკვიდრეობის სიაშია შეყვანილი.

კახეთის გამორჩეულად ცნობილი კულტურული მემკვიდრეობის ძეგლები დღემდე ძველი ტრადიციების მატარებელია. ისტორიულ მონუმენტურ ძეგლებს შორის აღსანიშნავაია უჯარმა, წინანდალი, ალავერდი, გრემი, ნეკრესი, შუამთა, ბოდბე, დავით გარეჯის მონასტერი. საინტერესოა ის, რომ დღემდე მოქმედებს ზოგიერთი მათგანის სახელობითი სახალხო დღესასწაულები – მაგალითად ალავერდობა.

კახეთის კიდევ ერთ ძირითად ღირსშესანიშნაობას პატარა ისტორიული ქალაქი სიღნაღი წარმოადგენს. იგი წარმატებული სავაჭრო და სახელოსნო ცენტრი იყო გვიან-შუა საუკუნეებში, ახლახან სიღნაღში ისტორიული შენობების, ეკლესიებისა და კულტურული ძეგლების რესტავრაცია განხორციელდა, რამაც ამ მომხიბლავ ქალაქში სულ უფრო და უფრო გაზრდა ტურისტების ნაკადი.

კახეთში გამორჩეულია ლანდშაფტებით, ბუნებრივი პირობებით, ღირსშესანიშნაობებით. აქ მდებარეობს რამდენიმე ეროვნული ნაკრძალი: ლაგოდეხის, ვაშლოვანის, მარიამჯვრის, ბაბანეულის და რამდენიმე აღკვეთილი, ისნი გამოირჩევიან განსაკუთრებული ბიომრავალფეროვნებით.

სამეცნიერო კონფერენციის ფარგლებში ტური კახეთში შედგება 23-24 მაისს, თქვენ მოინახულებთ ლაგოდეხის სახელმწიფო ნაკრძალს, ალავერდის მონასტერს, წინანდალის მუზეუმსა და ბაღს, ქალაქ სიღნაღს, დააგემოვნებთ ადგილობრივ, საუცხოო ღვინოსა და სამზარეულოს.